Sûrat Fâtir

35
XXXV – Sûrat Fâtir
[Kabanata Fâtir – Ang Nagpanimula ng Paglikha]

بسم الله الرحمن الرحيم
[Bismillâhir Rahmânir Rahîm]
Sa Ngalan ng Allâh, ang Pinakamahabagin, ang Napakamaawain at Ganap na Mapagmahal
1. Ang ganap na papuri at pasasalamat ay pagmamay-ari lamang ng Allâh (I) na Nagpanimula ng Paglikha ng mga kalangitan at kalupaan na Siya ang nagbukod-tangi nito, at ginawa Niya ang mga anghel bilang mga Sugo tungo sa sinuman na Kanyang nais mula sa Kanyang mga alipin at sa anuman na Kanyang nais na pag-uutos at pagbabawal, at kabilang sa dakilang kapangyarihan ng Allâh (I) ay ginawa Niya ang mga anghel na may mga pakpak na dalawa, tatlo o apat, na sila ay lumilipad sa pamamagitan nito; upang iparating ang anumang ipinag-utos ng Allâh (I), at dinaragdagan Niya ang paglikha sa anuman na Kanyang nais. Katiyakan, ang Allâh (I) ay ‘Qadeer’ – Makapangyarihan sa lahat ng bagay at walang anuman ang mahirap sa Kanya, na Siya ang may Kakayahan na gawin ang lahat ng bagay.

2. Anumang biyaya na ipinagkakaloob ng Allâh (I) sa mga tao, kabuhayan man, ulan, kalusugan o kaalaman at iba pa na mga biyaya, ay walang sinuman ang may kakayahan na pigilin ito, at sinuman ang pinigilan ng Allâh (I) sa kanya ang mga ganitong bagay ay walang sinuman ang may kakayahan na maipagkaloob ito sa kanya pagkatapos Niya. Dahil Siya ay ‘Al-`Azeez’ – ang Kataas-Taasan at Punung-Puno ng Karangalan na Ganap na Makapangyarihan sa pagtatangan Niya ng lahat ng bagay, na ‘Al-Hakeem’ – Ganap na Maalam na ipinapadala Niya ang Kanyang Biyaya at pinipigil Niya ayon sa Kanyang karunungan.

3. O sangkatauhan! Alalahanin ninyo ang Biyaya ng Allâh (I) sa pamamagitan ng inyong mga puso, mga dila at mga katawan, at walang sinuman na lumikha sa inyo bukod sa Allâh (I) na nagkakaloob sa inyo ng biyaya mula sa kalangitan sa pamamagitan ng ulan, at mula sa kalupaan sa pamamagitan ng tubig at mga minahan at iba pa, ‘Lâ i-lâ-ha il-lâ Huwa’ – walang sinuman ang may karapatan at karapat-dapat na sambahin bukod sa Kanya na Bukod-Tangi at walang katambal, na kung kaya, paano ninyo ibinabaling ang pagsamba mula sa Kanya patungo sa iba?

4. At kung pinasinungalingan ka ng iyong sambayanan, O Muhamamd, ay katiyakang pinasinungalingan din ang mga Sugo na nauna sa iyo, at sa Allâh (I) tutungo ang lahat ng bagay sa Kabilang-Buhay, at tutumbasan Niya ang bawa’t isa sa anumang karapat-dapat na para sa kanya. At dito sa talatang ito ay pampalubag-loob sa Sugo ng Allâh (r).

5-6. O sangkatauhan! Katiyakan, ang pangako ng Allâh (I) na Pagkabuhay na Mag-uli, gantimpala at parusa ay makatotohanan, na kung kaya, huwag hayaang malinlang kayo ng makamundong buhay na mga pagnanasa nito, at huwag hayaang malinlang kayo ng pinakapinuno ng tagapaglinlang na si ‘Shaytân’ hinggil sa Allâh (I). Katiyakan, si ‘Shaytân’ ay kalaban ng mga angkan ni Âdam, na kung kaya, ituring ninyo siyang kalaban at huwag pakasusundin, dahil walang pag-aalinlangan, hinihikayat niya ang kanyang mga tagasunod tungo sa pagkaligaw, upang sila ay maging kabilang sa mapupunta sa naglalagablab na apoy.

7. Ang mga yaong tinanggihan ang Kaisahan ng Allâh (I) at ang anumang dala-dala ng Kanyang mga Sugo ay para sa kanila ang matinding parusa sa Kabilang-Buhay, at ang mga yaong naniwala sa Allâh (I), sa Kanyang mga Sugo at gumawa ng mga kabutihan, para sa kanila ay kapatawaran sa kanilang mga kasalanan at dakilang gantimpala na ito ay ‘Al-Jannah’ (Hardin).

8. Siya ba, kung gayon, na ginawa ni ‘Shaytân’ na kaigaya-igaya sa kanyang pananaw ang masamang gawain, paglabag sa Allâh (I), di-paniniwala at pagsamba ng iba bukod sa Allâh (I) na mga diyus-diyosan at mga rebulto, at itinuturing niya na ito ay kabutihan para sa kanya, ay magiging katulad ba siya ng sinumang ginabayan ng Allâh (I) at nakikita niya na mabuti ang anumang kabutihan at masama ang anumang kasamaan? Katiyakan, inililigaw ng Allâh (I) ang sinuman na Kanyang nais mula sa Kanyang mga alipin, at ginagabayan Niya ang sinuman na Kanyang nais, na kung kaya, huwag mong ipahamak ang iyong sarili sa pamamagitan ng pagdalamhati at pagkalungkot dahil sa pagtanggi ng mga ligaw. Katotohanan, ang Allâh (I) ay ‘`Aleem’ – Ganap na Nakaaalam sa kanilang mga masamang gawain at tinutumbasan Niya sila nang masamang kabayaran.

9. At ang Allâh (I) ay Siyang nagpapadala ng mga hangin upang itulak ang mga ulap, na dinadala Namin ito tungo sa mga tuyot na kalupaan, at bumababa ang tubig at binubuhay Namin sa pamamagitan nito ang kalupaan pagkatapos nitong maging tuyot, nagiging luntian sa pamamagitan nito ang mga pananim, at ganito bubuhayin ng Allâh (I) ang mga namatay sa Araw ng Muling Pagkabuhay.

10. Ang sinumang naghahangad ng karangalan dito sa daigdig o di kaya ay sa Kabilang-Buhay ay hilingin niya ito mula sa Allâh (I), at hindi ito makakamtan kundi sa pamamagitan lamang ng pagsunod sa Kanya, dahil Pagmamay-ari ng Allâh (I) ang lahat ng parangal, na kung kaya, sinuman ang naghangad ng karangalan para sa kaninumang nilikha ay ibababa siya ng Allâh (I) at ang sinumang naghangad ng karangalan nang alang-alang sa Allâh (I) na Tagapaglikha ay iaangat siya mismo ng Allâh (I). Tungo sa Kanya umaakyat ang mabubuting salita na ito ay mga papuri sa Kanya at itinataas Niya patungo sa Kanya ang mabuting gawain. At ang mga yaong gumawa ng kasamaan ay para sa kanila ang masidhing kaparusahan, at ang kanilang mga pakana ay mawawasak at masisira at hindi nila mapakikinabangan.

11. At ang Allâh (I) ay Siyang lumikha ng inyong ama mula sa alikabok, pagkatapos ginawa Niya ang kanyang lahi na dumami sa pamamagitan ng lusaw na semilya na hindi pinahahalagahan, pagkatapos ginawa Niya kayo ng mga kalalakihan at mga kababaihan. At walang anumang pinagdadalang-tao ang babae o anuman na kanyang ipinanganganak kundi ito ay nasa kaalaman ng Allâh (I), at walang sinumang pinagkalooban ng mahabang buhay o ang isang bahagi ay binawas mula sa kanyang buhay kundi ito ay nakatala na sa kanyang aklat, na ito ay ‘Al-Lawh Al-Mahfoudh,’ bago pa siya ipagdalang-tao ng kanyang ina at bago pa siya ipanganak nito. Katiyakan, itinala ng Allâh (I) ang lahat ng bagay, at ganap na batid Niya itong lahat bago Niya pa ito likhain, at wala nang maidaragdag ni maibabawas sa anuman na Kanyang itinala. Katiyakan, ang paglikha sa inyo at ang kaalaman hinggil sa inyong katayuan at ang pagtala nito sa ‘Al-Lawh Al-Mahfoudh’ ay napakadali para sa Allâh (I).
12. At hindi magkatulad ang dalawang karagatan: ito ay matabang na matindi ang pagiging matabang nito, na madaling naipapasok sa lalamunan na pumapawi ng uhaw, at ang isa naman ay maalat na matindi ang pagkaalat nito, at mula sa dalawang uri ng tubig na ito ay nakakakain kayo ng isda na sariwang laman na malambot na masarap ang lasa, at nakukuha ninyo mula rito ang mga palamuti, na tulad ng perlas, mga ‘corals’ at iba pa, na ginagamit ninyo bilang palamuti, at nakikita ninyo ang mga sasakyang pantubig dito na naglalayag, upang marating ninyo sa pamamagitan ng kagandahang-loob ng Allâh (I) ang inyong mga gawain, pangangalakal at iba pa. Dito sa talatang ito ang patunay sa kakayahan ng Allâh (I) at ng Kanyang Kaisahan; upang kayo ay tatanaw ng utang na loob sa Allâh (I) sa Kanyang biyaya na ipinagkaloob sa inyo.

13. At ang Allâh (I) ay nagpapasok ng panahon mula sa mga bahagi (o oras) ng gabi sa araw at nadaragdagan ang haba ng araw batay sa kung gaano karami ang nabawas sa bahagi ng gabi, at ganoon din bilang kabaligtaran nito, na Siya ay nagpapasok ng panahon mula sa mga bahagi (o oras) ng araw sa gabi at nadaragdagan ang haba ng gabi batay sa kung gaano karami ang nabawas sa bahagi ng araw, at ginawa Niya na madali ang kapakinabangan sa araw at buwan, na ito ay umiinog batay sa itinakdang panahon, at ang nagpapatakbo nitong lahat ay ang Allâh (I) na inyong ‘Rabb’ na Tagapaglikha na Nagmamay-ari ng lahat, subali’t ang inyong mga sinasamba bukod sa Kanya ay wala silang Pagmamay-ari na kahit na kasinglaki ng ‘Qitmir’ – isang manipis na manipis na balat na kulay puti na nakabalot sa buto ng ‘tamr’ (datiles o dates).

14. Kapag pinananalanginan ninyo, O kayong mga tao, ang mga sinasamba na ito bukod sa Allâh (I) ay hindi nila maririnig ang inyong panalangin, at kahit na marinig pa nila ay wala rin silang maitutugon sa inyo, at sa Araw ng Muling Pagkabuhay ay itatanggi nila kayo, at walang sinuman ang makapagpapahayag nito sa iyo, O Muhammad, na mas higit pa sa katotohanan na inilahad sa iyo ng Allâh (I) na ‘Khabeer’ – Ganap ang Kanyang Kagalingan na Nakababatid ng lahat at Pinakadalubhasa.

15. O sangkatauhan! Kayo ang siyang nangangailangan sa Allâh (I) sa lahat ng pagkakataon, at kailanman ay hindi mawawala ang iyong pangangailangan sa Allâh (I) nang kahit na isang kurap ng mata, Siya ay ‘Al-Ghanee’ – ang Malaya sa anumang pangangailangan, na walang pangangailangan na kahit na anumang bagay mula sa Kanyang mga nilikha, na ‘Al-Hameed’ – karapat-dapat sa lahat ng papuri na pinupuri sa Kanyang Sarili, sa Kanyang mga Pangalan at mga Katangian sa lahat ng pagkakataon.

16. Kung ninais ng Allâh (I) ay wawasakin Niya kayong lahat, O kayong mga tao, at papalitan kayo ng ibang nilikha na mas mabuti kaysa sa inyo na tuwirang sumusunod sa Allâh (I).

17. At ang pagwasak sa inyo at ang paglikha nang ganito bukod sa inyo ay hindi mahirap sa Allâh (I) kundi ito ay napakadali lamang.

18. At hindi papasanin ng sinumang tao ang kasalanan ng iba at kahit na hilingin pa ng sinumang tao na ipapapasan sa iba ang kanyang mabigat na kasalanan ay hindi siya makatatagpo ng kahit na sinumang papasan ng kanyang kasalanan, kahit na ang hihilingan pa niya ay kanyang sariling dugo na tulad ng kanyang ama, kapatid o mga katulad nila. Katiyakan, ang mababalaan mo lamang, O Muhammad, ay ang mga yaong natatakot nang palihim sa parusa ng kanilang ‘Rabb’ na Tagapaglikha, at isinasagawa nila ang ‘Salâh’ nang ganap. At sinuman ang nililinis niya ang kanyang sarili mula sa kasalanan ng pagtambal at iba pa ay sarili rin lamang niya ang kanyang nililinis at siya mismo ang makikinabang nito. At sa Allâh (I) patutungo ang lahat ng Kanyang nilikha at tutumbasan Niya ang bawa’t isa ng anuman na karapat-dapat na para sa kanya.
19-24. At hindi maaaring magkaparehas ang bulag sa ‘Deen’ (o Relihiyon) ng Allâh (I) at ang nakakikita ng Daan ng Katotohanan at ito ay kanyang sinunod, at hindi maaaring magkapantay ang kadiliman ng Di-Paniniwala at ang Liwanag ng Paniniwala, ganoon din ang lilim at ang init ng araw, at hindi rin magkapantay ang mga tao na buhay ang kanilang mga puso sa paniniwala at ang mga patay ang kanilang mga puso sa di-paniniwala.

Katiyakan, sasanhiin ng Allâh (I) na makarinig ang sinuman na Kanyang nais na makarinig nang may pagkakaintindi at pagtanggap, at ikaw, O Muhammad, ay hindi mo kayang parinigin ang mga nasa libingan at kung paano di-nakaririnig ang mga namatay na nasa kanilang mga libingan ay ganoon din na hindi rin nakaririnig ang mga walang pananampalataya na namatay ang kanilang mga puso, at ang tungkulin mo lamang ay balaan sila sa galit at kaparusahan ng Allâh (I).

Katiyakan, ipinadala ka Namin nang may mensahe ng katotohanan, na ito ay bukod-tanging paniniwala sa Allâh (I) at sa mga alituntunin ng Kanyang ‘Deen,’ at tagapagbigay ng magandang balita hinggil sa ‘Al-Jannah’ (Hardin) sa sinumang naniwala sa iyo at sumunod sa iyong patnubay, at bilang tagapagbabala hinggil sa Impiyerno sa sinumang di-naniwala at lumabag sa iyo. At walang sinumang sambayanan sa mga naunang sambayanan kundi dumating sa kanila ang babala na sila ay binalaan hinggil sa masamang kahihinatnan ng paglabag at pagkaligaw.

25. At kung tinanggihan ka ng mga ‘Mushrikun’ – sumasamba ng iba bukod sa Allâh (I) ay walang pag-aalinlangan na tinanggihan din ng mga nauna sa kanila ang kanilang mga Sugo, na sila ay nagdala sa kanila ng mga malilinaw na mga himala na nagpapatunay sa kanilang pagiging Propeta, at dala-dala nila ang mga Kasulatan na nagsasaad ng maraming alintuntunin, at ang Aklat na malinaw na liwanag sa pagitan ng landas ng kabutihan at kasamaan.

26. Pagkatapos ay pinuksa Ko ang mga walang pananampalataya sa pamamagitan ng iba’t ibang uri ng parusa, na kung kaya, pagmasdan mo, kung gaano kasidhi ang Aking pagtanggi sa kanilang gawain at pagpapataw sa kanila ng Aking kaparusahan!
27. Hindi mo ba nakita na ang Allâh (I) sa katunayan ay nagbababa mula sa kalangitan ng tubig, at dinidiligan Namin sa pamamagitan nito ang mga puno sa kalupaan, at pinabubunga Namin ang mga puno na yaon ng iba’t ibang kulay, mayroong pula, itim, dilaw at iba pa? At nilikha Namin sa mga kabundukan bilang mga daan na mga mapuputi at pula, at iba’t ibang kulay, lumikha rin Kami mula sa mga kabundukan ng mga bundok na matitindi ang kaitiman nito.

28. At lumikha rin Kami ng mga tao at ang mga lumalakad sa kalupaan na kamelyo, mga baka at mga kambing na iba’t iba rin ang kanilang mga kulay, na mayroong pula, puti, itim at iba pa; na katulad din ng iba’t ibang kulay ng mga bunga at kabundukan. At ang tunay lamang na natatakot sa Allâh (I) sa Kanyang parusa sa pamamagitan ng pagsunod at pag-iwas sa mga ipinagbabawal ay ang mga maalam at nakakikilala sa kadakilaan ng Allâh (I), sa Kanyang Katangian, sa Kanyang Batas at sa Kanyang Kapangyarihan sa lahat ng bagay, at kabilang dito ang kaalaman sa iba’t ibang uri ng mga nilikha na kahit isa lang ang pinagmumulan, at pinag-aaralan nang labis ang kaalaman na nakukuha rito. Katiyakan, ang Allâh (I) ay ‘`Azeez’ – Kataas-Taasan at Punung-Puno ng Karangalan na Ganap na Makapangyarihan na walang sinuman ang makagagapi sa Kanya, na ‘Ghafour’ – Ganap na Mapagpatawad, na ginagantimpalaan ang mga sumusunod at pinatatawad.

29-30. Katiyakan, ang mga yaong binabasa nila ang Qur’ân at sinusunod ang katuruan nito, at patuloy ang kanilang pagsasagawa ng ‘Salâh’ sa tamang oras nito at gumagasta sila mula sa ipinagkaloob sa kanila na kabuhayan ng iba’t ibang kaparaanan ng paggasta, obligado man o hindi, lihim man o lantad, at inaasam nila rito ang katiyakan na pakikipagkalakalan na walang pagkatalo at hindi magmamaliw na ito ay ang pagmamahal lamang ng Allâh (I) kanilang ‘Rabb’ na Tagapaglikha at pagkamit ng Kanyang masaganang gantimpala; upang ipagkaloob ng Allâh (I) sa kanila ang ganap na gantimpala sa kanilang mga gawain na walang kabawasan, at pagkakalooban ng higit pang gantimpala ang mga kabutihan na kanilang ginawa mula sa Kanyang kagandahang-loob.

Katiyakan, ang Allâh (I) ay ‘Ghafour’ – Ganap na Mapagpatawad sa kanilang mga kasalanan, na ‘Shakour’ – Ganap na Tagapagtangkilik ng kanilang kabutihan na ginagantimpalaan sila ng masaganang gantimpala para rito.
31. Ang ipinahayag Namin sa iyo, O Muhammad, na Banal na Qur’ân ay walang pag-aalinlangan na nagpapatunay sa mga naunang Aklat na ipinahayag sa mga Sugo na nauna sa iyo. Katiyakan, ang Allâh (I) ay ‘Khabeer’ – Ganap ang Kanyang Kagalingan na Pinakadalubhasa hinggil sa Kanyang mga alipin, na ‘Baseer’ – Ganap na Tagapagmasid sa kanila at walang anuman ang naililihim sa Kanya.

32. Pagkatapos ipinagkaloob Namin bilang pamana ang Banal na Qur’ân pagkatapos mawasak ng mga naunang sambayanan sa sinumang pinili Namin mula sa sambayanan ni Muhammad: mayroon sa kanila ang inapi ang kanilang mga sarili sa pamamagitan ng pagsagawa ng ilang mga kasalanan, at mayroon naman sa kanila ang nasa kalagitnaang kalagayan ng pagsunod na gumagawa ng mga ipinag-uutos at iniiwasan ang mga ipinagbabawal, at mayroon naman sa kanila ang nangunguna sa pagsagawa ng kabutihan sa kapahintulutan ng Allâh (I), na ibig sabihin ay palaging nakikipag-unahan, nagmamadali at nagsusumigasig sa pagsagawa ng mga mabubuting gawa, obligado man o hindi.

Na ang ganitong pagkakaloob ng Aklat at pagpili sa sambayanan na ito ay isang dakilang kagandahang-loob.

33-35. Ng mga Hardin na sila ay mananatili roon magpasawalang-hanggan, sila na mga pinagkalooban ng Aklat ay dadamitan doon ng mga pulseras (o ‘bracelets’) na gawa sa ginto, mga perlas, at ang pangkaraniwang damit doon ay kasuotan na gawa sa sutla. At sasabihin nila sa pagpasok nila sa ‘Al-Jannah’ (Hardin): “Ang lahat ng papuri at pasasalamat ay sa Allâh (I) lamang na Siyang nag-alis sa amin sa kapighatian, katiyakan, ang Allâh (I) na aming ‘Rabb’ na Tagapaglikha ay ‘Ghafour’ – Ganap na Mapagpatawad; dahil pinatawad sa amin ang aming kamalian, na ‘Shakour’ – Ganap na Tagpagtangkilik; dahil tinanggap Niya sa amin ang aming kabutihan at hinigitan pa Niya ang pagkaloob ng gantimpala nito. At pinatuloy Niya kami sa Tahanan ng Hardin mula sa Kanyang kagandahang-loob, na hindi na mangyayari pa sa amin dito ang anumang kapaguran at kahirapan.

36. At ang mga yaong hindi naniwala, ang para sa kanila ay naglalagablab na Impiyernong-Apoy, at hindi sila malalagutan ng buhay doon para mamatay at hindi sila mamamatay doon para makapagpahinga, at hindi pagagaanin sa kanila ang kaparusahan. Sa ganito tutumbasan ng Allâh (I) ang sinumang tumanggi na di-naniwala sa Kanya at sa Kanyang Sugo.

37. At sila na mga hindi naniwala ay magsisisigaw sa sidhi ng parusa sa Impiyernong-Apoy na humihingi ng saklolo: “O aming ‘Rabb’ na Tagapaglikha! Palabasin mo kami sa Impiyernong-Apoy at ibalik Mo kami sa daigdig dahil gagawa kami ng mabuti na hindi tulad ng yaong ginawa namin noong kami ay nasa daigdig pa, at maniniwala na kami sa halip na tumanggi,” at sasabihin sa kanila: “Di ba pinagkalooban Namin kayo ng sapat na buhay sa daigdig, na yaon ay sapat na upang makaintindi ng pagpapayo ang sinumang iintindi, at dumating sa inyo ang Propeta subali’t hindi pa rin kayo nakaalaala at hindi pa rin kayo tumanggap ng pagpapayo? Kung gayon, lasapin ninyo ang parusa ng Impiyerno, dahil wala nang sinumang makatutulong sa mga di-naniwala upang sila ay iligtas sa kaparusahan ng Allâh (I).”

38. Katiyakan, ang Allâh (I) ay Siyang Nakamamasid sa lahat ng di-nakikita sa mga kalangitan at sa kalupaan, at katiyakang siya ay Ganap na Nakaaalam sa mga kinikimkim sa mga dibdib o kalooban, na kung kaya, matakot kayo sa Kanya na kayo ay nakikita Niya na kinakimkim ninyo ang pagdududa o di kaya ay ang pagsamba ninyo ng iba bukod sa Kanya, o di kaya ay ang pagdududa ninyo sa pagiging Propeta ni Propeta Muhammad o di kaya ay makagawa kayo ng paglabag bukod dito.

39. Ang Allâh (I) ay Siyang lumikha sa inyo, O sangkatauhan! Na kayo ay nahahalinhinan ng isa pagkatapos ng isa na kapag may namatay ay may papalit na panibago, na kung kaya, sinuman ang hindi naniwala sa inyo ay sarili lamang niya ang kanyang pinipinsala, walang maidagdag sa mga walang pananampalataya ang di nila paniniwala sa kanilang ‘Rabb’ na Tagapaglikha kundi karagdagang galit sa Kanyang galit, at walang maidaragdag ang gawaing ito sa kanila kundi pagkaligaw at kapahamakan.
40. Sabihin mo, O Muhammad (r), sa mga walang pananampalataya: “Sabihin ninyo sa akin kung ano ba ang nilikha ng inyong mga sinasamba rito sa kalupaan, o di kaya ay mayroon ba sa mga sinasamba ninyo bukod sa Allâh (I) ang naging kaparte (kabahagi o kasama) ng Allâh (I) sa paglikha sa kalangitan, o di kaya ay pinagkalooban ba Namin sila ng aklat upang ito ang pagbatayan nila bilang malilinaw na katibayan? Hindi ang kanilang inaakala ang katotohanan, kundi bagkus walang ipinangako ang mga walang pananampalataya sa isa’t isa kundi pagmamayabang at panlilinlang.”

41. Katiyakan, ang Allâh (I) ay Siyang nagtatangan sa mga kalangitan at kalupaan upang hindi gumalaw ang mga ito sa kanilang mga kinalalagyan, at kapag gumalaw ang mga kalangitan at ang kalupaan sa mga kinaroroonan nito, sino pa ang makapagtatangan nito pagkatapos Niya. Katiyakan, ang Allâh (I) ay ‘Haleem’ – Ganap na Maunawain sa pag-aantala Niya sa pagpaparusa sa mga di-naniwala at mga masasama, na ‘Ghafour’ – Ganap na Mapagpatawad sa sinumang nagsisi sa kanyang nagawang kasalanan at nagbalik-loob sa Kanya.

42. At sumumpa ang mga walang pananampalataya na mga Quraysh, sa Allâh (I) nang matinding pagsumpa: kapag dumating sa inyo ang Sugo mula sa Allâh (I) bilang tagapagbabala hinggil sa kaparusahan ng Allâh (I) ay walang pag-aalinlangang kayo na ang nasa pinakatuwid na landas at pagsunod sa katotohanan kaysa sa mga Hudyo, mga Kristiyano at iba pa, subali’t nang dumating sa kanila si Muhammad ay walang naidagdag sa kanila nito kundi paglayo sa katotohanan at pagtalikod.
43. Ang kanilang panunumpa ay walang layunin na mabuti at paghahangad ng katotohanan kundi pagmamataas sa kalupaan sa mga tao, at ang talagang layunin nila ay masamang pakana, panlilinlang at kamalian, at walang napapahamak sa masamang pakana kundi ang sinumang gumawa mismo nito, na kung kaya, may inaabangan pa ba ang mga nagmamataas na nagpapakana maliban sa parusa na nangyari sa mga katulad nila na mga nauna sa kanila? Kailanman ay hindi ka makatatagpo sa kaparaanan ng Allâh (I) ng pagbabago at paglilihis, na kung kaya, walang sinuman na may kakayahan na palitan ito at ilalayo ang parusa mula sa kanyang sarili o mula sa iba man.

44. Hindi ba naglakbay sa kalupaan ang mga walang pananampalataya na taga-Makkah upang mapagmasdan nila kung paano pinarusahan ng Allâh (I) ang nauna sa kanila na katulad ng sambayanan ni `Âd, ni Thamoud at ang mga iba pa na tulad nila, at ang anuman na nangyari sa kanila na pagkawasak at pagkasira ng kanilang mga tahanan noong tinanggihan nila ang mga Sugo gayong sila na mga walang pananampalataya na mga nauna ay mas matindi sa lakas at kapangyarihan kaysa sa mga taga-Makkah? Katiyakan, ang Allâh (I), kailanman ay hindi magagapi at hindi makaliligtas sa Kanya ang anumang bagay na nasa mga kalangitan at ganoon din sa mga kalupaan, dahil walang pag-aalinlangang Siya ay ‘`Aleem’ – Ganap na Nakaaalam sa kanilang mga gawain, na ‘Qadeer’ – Ganap na Makapangyarihan sa pagpuksa sa kanila.

45. At kung parurusahan ng Allâh (I) ang tao sa kanilang mga nagawang kasalanan at kasamaan, hindi Niya pahihintulutan na mag-iwan ng kahit na anumang buhay na bagay sa ibabaw ng kalupaan, subali’t pinagbibigyan Niya lamang sila at inaantala ang pagparusa sa kanila hanggang sa pagdating ng nakatakdang panahon, at kapag dumating ang itinakdang oras na pagparusa sa kanila ay walang pag-aalinlangang ang Allâh (I), Siya ay ‘Baseer’ – Ganap na Tagapagmasid sa Kanyang mga alipin na walang anuman ang naililihim sa Kanya mula sa kanila, at walang anuman ang naitatago sa Allâh (I) hinggil sa kanilang mga kalagayan, at sila ay tutumbasan Niya ayon sa kanilang mga ginawa, mabuti man o masama.